HerbaZ

ما ادري ليه انا احب احطمكم ، بس يلا معليش ، من جد المعرض هذا كل سنة عن السنة الثانية يطلع اسخف وابيخ وأسوأ تنظيم ، وأسوأ طبعاً فهم !

انا امنية حياتي اعرف ليه تجي شركات الاتصالات كلها ( STC - Mobily - Bravo ) وتعرض خدمات الاتصالات ، بينما انه بعد ثلاث شهور او اقل بيكون معرض الاتصالات والاسلكي ، ( مدري اصلاً هو جا اساساً ) . يلا معليش نقول شركات الاتصالات ، جزء من التقنية . نروح لمعهد دايركت انجليش ( التابع للخليج - ونيوهورازن ) !!

انا مشكلتي الى الآن مافهمت معرض جايتكس بالظبط وش يكون مقارنه بجايتكس دبي ! او هل المشكلة فقط تشابه اسماء !!
يعني لما نحضر معرض بإسم ” جايتكس ” انا اتوقع ان حنا بنشوف اول الشركات اللي حاضره ( مايكروسوفت - اوراكل - سيسكو - ابل - انتل - IBM ) وغيرها من الشركات اللي لها اسمها وسمعتها في السوق .. مو مؤسسة تبيع جوالات نوكيا !! واجهزة ملاحة (GPS ) خاصة بالصيد والرحلات البريه ! — كويس هالسنة مافيه معرض الصناعات الصينيه مدري التايلانديه !
لكن السنه هذي ولا واحده من الشركات الي ذكرتها اعلاه جت !

وياليت المشكلة تقف عند هنا وبس ، المعرض المصاحب لجايتكس ( وهو معرض المشتريات او البيع المباشر ) سبب زحمة وقلق نفسي للجميع ، من جد المفترض يكون المعرض بعد جايتكس باسبوع او بعد ماينتهي جايتكس يفتحون المعرض ، او على الاقل يحطونه في مكان ثاني ، لان من جد زحممممة بشكل خيالي مايتصورها الواحد ، وياليت فيه شي يستاهل اصلاً .

انا من هنا اعلن مقاطعتي لمعرض جايتكس لجميع السنوات القادمة ( جايتكس الرياض طبعاً )
امنيتي احد المسؤولين على شركة معارض الرياض يوصله هالرسالة الي من جد تعبنا نوصل لهم الزحمة في المعرض وبياخه العروض اللي فيه والشركات ! اللي كل سنه تختفي الشركات اللي فعلاً هي التقنية وتحل محلها شركات !! مع احترامي ” اي كلام ياعبدالسلام ” .

والسلام

هذا الموضوع كتب في 4/29/2006 في الساعة 3:15 pm ومصنف بهذه التصنيفات: عام. يمكنك متابعة التعليقات على هذا الموضوع عن طريق ملف الخلاصات RSS 2.0. لا يمكنك التعليق على الموضوع، لكن يمكنك كتابة تعقيب من موقعك.