قائمة حرباز لأسوأ البنوك السعودية
مرحباً ، منذ اكثر من ثلاث سنوات وأنا اريد الكتابة حول هذا الموضوع وتخصيص قائمة سنوية لأسوأ البنوك في السعودية ، طبعاً لا اقول ان البنوك سيئة جداً ،، لكن هذه القائمة هي بترتيب عكسي ، أي ان أسوأ بنك سوف يكون في المركز الأول وأفضل بنك سيكون في المركز الأخير .
قد يقول البعض أن هذه القائمة ليست بدقيقة أو تمثل وجهة نظر شخصية فأقول لهم القائمة تمثل وجهة نظري الشخصية وبإمكان أي شخص أن يقوم بإنشاء موقع خاص فيه وإدراج قائمته لأفضل البنوك أو أسوأها ، لكن من يقول أن قائمتي لاتسند على معلومات أو ليست دقيقة فأقول له اني سبق وان عملت في بنكين مختلفين لأكثر من 3 شهور في كل بنك وأعتقد انها فترة كافيه لتعلم أهم المعلومات عن آلية العمل في البنك وطريقة التعامل مع العملاء والحسابات والتحويل والخدمات الإلكترونية ، بالإضافة طبعاً إلى علاقاتي مع موظفي البنوك السعودية ومعرفتي بأغلب أخبار البنوك المحلية .
هذه القائمة سوف تكون بإذن الله سنوية لنر إن كان البنك السيء قد حافظ على مستواه الردي أم انه حاول أن يتطور لينزل مستواه عن المركز الأول في القائمة الحربازية لأسوأ البنوك السعودية . ولكي لا نظلم البنوك الباقية سوف أذكر فقط أسوأ 3 بنوك وسوف أذكر أفضل 3 بنوك في الأخير
طريقة تقييمي للبنوك قائمة على عدة عناصر من أهمها : خدمة العملاء ، آلية العمل في البنك ، مركزية الإدارة ، خدمات البنك الإلكترونية ، الفروع ، الخدمات العامة ، وطبعاً كل بنك اتكلم عنه لي حساب فيه لأكثر من سنتين يعني اتكلم من واقع خبرة وليس من واقع يقال لي او اخوي
نبدأ بالإستعانة بالله ثم عرض القائمة
سبب الترشيح : حتى بعد تغييرة للمسمى وتغيره لواجهة البنك وشعاره والصور الموجودة في صرافات الـATM وإستخدامه لأحدث الأجهزة في الصرف والإيداع لكن لايزال في المركز الأول متصدراً قائمة أسوأ البنوك سواءً في مركزيته الإدارية أو في التعامل مع العملاء أو في صرافاتهم الكثيرة التعطل وشبكتهم الغير مستقرة أبداً بالإضافة إلى فشل نظام تداول الإلكتروني عبر الانترنت
نقاط القوة : عن طريق البنك يمكنك سداد العديد من الخدمات مثل الهاتف والجوال والتأمينات والجوازات والتأشيرات والمخالفات المرورية وبعض الخدمات مثل بطاقات المسبقة الدفع ، كما أنه البنك المفضل لدى أغلب الملتزمين والمحافظين ( لإعتقادهم بخلوه من الربا ) وشخصياً أرى انه لايوجد بنك لاتوجد له حسابات ربوية ، وما احط في ذمتي شي 
.
سبب الترشيح : بنك الرياض سبق مصرف الراجحي بتغيير البنية التحتيه والشعار والموقع وطريقة الإدارة بشكل بسيط تحت شعاره المعروف ، بنك الرياض بنكي . لكنه مازال يحتل على مركزه الثاني كأسوأ بنك في آلية عمل الحسابات وإيقافها كان لي حسابين فيه وكلهن توقفن بالرغم من وجود رصيد فيها ، البنك يعتبر من البنوك المتأخرة قليلاً في تطبيق الخدمات الحديثه وفي نفس الوقت يتباهى بأنه الرائد في تقديم خدمات إلكترونية حديثة ، أشتهر البنك بأنه بنك ربوي في السنوات الماضية ثم راحت العين عنه
نقاط القوة : البنك كان أول بنك يمكنك عن طريقة سداد المخالفات المرورية لكن لأسف لم يحافظ على صدارته وتنافس مع بقالة الراجحي عفواً مصرف الراجحي ، ومازال البنك يحاول النهوض ولو متأخراً في تقديم خدمات جديدة ومتميزه من اهمها الخدمات الإلكترونية الحديثه ونظام تداول .
سبب الترشيح : يُسمى البنك العربي بإسم بنك الشيبان أو البنك القديم أو بنك التقاعد ، ليس لتدليله للفئة الغالية على قلوبنا وهم أهلنا واجدادنا المتقاعدين بل لأن معاشات التقاعد مربوطة على نظام البنك العربي وهو المسؤول أمام الله عن رواتبهم ، البنك يعتبر البنك المتأخر جداً جداً في جميع الخدمات وهو البنك الوحيد الذي لاتستطيع أن تتذكر شعاره لقلة إعلاناتهم وقلة فروعهم ، بالإضافة إلى ان خدمات العملاء لديهم تتعامل مع شريحة كبيرة من كبار السن وتفتقر إلى اسلوب التفاهم معهم وتقديرهم وتقدير عمرهم .
نقاط القوة : البنك من أفضل البنوك إذا كنت تريد ان تجعل حسابك الإدخاري عليه فنظامهم مستقر وآمن جداً وقلما تجد عليه مشاكل لكن إن كنت تريد ان تجعله حسابك الرئيسي لا انصحك .
=======================================================
والآن قائمة أفضل البنوك السعودية والتي تثبت بجدارة فعاليتها وإفتخر بتعاملي معهم وإحقاقاً للحق ومثلما ذكرنا نقاط القوة في البنوك السيئة السابقة سوف أذكر أيضاً نقاط الضعف في البنوك
سبب الترشيح : البنك قائم على بنية تحتيه رائعه وينتمي إلى أعرق البنوك العالمية وهو HSBC العالمي ويعتبر البنك الأفضل من كل النواحي الأمنية والتقنية والتعامل مع العملاء وتوفير خدمات رائعه للعملاء بالرغم من قلة الفروع إلا انك قلما تجد زحمة في البنك او ضغط عليه وكذلك التقارير ونظام تداول في الإنترنت يعتبر من أفضل النظم على الرغم من أنه لم يكن أول نظام تداول يتم طرحه اون لاين .
نقاط الضعف : البنك يفتقر إلى كثرة الفروع ففروعه قليلة وكذلك مكائن الإيداع النقدي لاتوجد في الرياض سوى 4 مكائن تقريباً وغالباً ماتتعطل في يوم الجمعة ولايتم اعادة تشغيلها الا يوم السبت .
سبب الترشيح : على الرغم ان البنك واجه في بداياته إنضمام عدة بنوك ( البنك السعودي الأمريكي - البنك المتحد - القاهرة السعودي ) وكان اخر اندماج للبنوك عام 2000 تقريباً حيث اتحدت جميعها تحت راية واحدة البنك السعودي الأمريكي - سامبا ، يتميز البنك ببنية تحتيه رائعه خصوصاً حينما كانت البنية التحتيه قائمة على ارتباط بمجموعة citybank وهي تعتبر من البنوك الرائده حول العالم و المنافسة لبنوك HSBC والبنك يبدع دائماً بإستعراضه لأحدث التقنيات والخدمات الجديدة وكان هو البنك الأول في توفير خدمة الإيداع النقدي عن طريق مكائن الصرافه وسداد الخدمات اون لاين وغيرها .
نقاط الضعف : تقريباً لايوجد أحد ساكن في مدينة الرياض لايمتلك حساب في بنك سامبا والبنك لا اتوقع له الإستمرار على تقديمه الخدمات الرائعه لكثرة عملائه ، واتوقع عدم قدرة الشبكة والأنظمة على إستحمال هذا الضغط الهائل عليها ، ومع ذلك لاتزال البنية التحتيه متماسكة ومترابطه ، بالتوفيق .
سبب الترشيح : واااوو ياجماعة الخير البنك هذا خطير ، ماشاء الله تبارك الله ،، سنة 2006 كانت من أنجح السنوات على بنك الأهلي بعد نوم إستمر طويلاً ، لكن صحى بشكل نشيط جداً ، البنك بدأ بخدماته الجديدة والقوية كخدمات الأهلي اون لاين واهلي تداول وأهلي إي بيمنت وغيرها كثير ، كذلك أعظم ميزة فيه هو كثرة فروعه وإنتشارها في الرياض وفي كل مناطق المملكة كما هو مخطط له في السنة 2007 ، هذه الميزة تترك للعميل الحرية في إختيار الفرع ودخوله للفرع وهو مؤمن بأنه لن يجد اكثر من 10 اشخاص في الفرع على قائمة الإنتظار . كما انهم ابدعوا في الخدمات المصرفية الإلكترونية كهاتف الأهلي او التداول عن طريق الهاتف ، كما انه يوفر تسديد الخدمات والمرافق العامه والجامعات والرسوم الحكومية واتوقع له السنة القادمة ان يحتل المركز الثاني او الأول إذا استمر على تقديم خدماته الرائعه .
نقاط الضعف : البنك لايحتوي على عيوب واضحه سوى بعض المشاكل التقنية البسيطة جدا ًوسوف يتم حلها بالتأكيد مع ثبات النظام ، ولكن لا استطيع ان اجعل البنك في المركز الأول مباشرة لعدم احتوائه على عيوب او نقاط ضعف .
انتهت القائمة ، وبقي ان اذكر انه توجد بنوك عديدة بدأت حديثاً او قديماً ولها خدمات وفيها عيوب لكن لم اتطرق لها ، كبنك البلاد ، بنك الجزيرة ، البنك الفرنسي ، البنك السعودي الهولندي ، البنك السعودي للإستثمار ان كان احد قد سمع به
لكن المظلمة شينه ولم اقم بتجربة البنوك السابقة تجربة طويلة لكن بإذن الله في السنة القادمة سوف يتم إدخالها في القائمة بعد ان يكمل تعاملي معهم سنة على الأقل حتى اعرف البنك وعيوبه ومحاسنه .
اتمنى ان تكون القائمة حازت على رضاك وأن تضع في الحسبان بأن هذه القائمة تمثل وجهة نظر شخصية يتخللها بالتأكيد تجربتي الشخصية والمتواضعه ومن خلال عملي السابق في احد البنوك ومعرفتي للأنظمة البنكية ، ويجب ان تعرف أيضاً اني لا املك اي ضغينة خاصة تجاه أي بنك خصوصاً البنوك المذكورة كأسوأ البنوك لكن في بعض الأحيان الحقيقة تكون مره .
3/14/2007 في الساعة 10:46 pm
والله جبتها يا باسم
خصوصاً مصرف البنقالة “الراجحي” ، قسم بالله يوم تدخله كنك في بوفيه هنود من الروايح
سلام
3/14/2007 في الساعة 11:05 pm
شف انا لي خبرة بالأهلي وبالراجحي اما ساب فا انا عميل جديد، وتنصيفهم كالتالي من الأسوء للأفضل:
الراجحي: لا تعليق وتعجز الكلمات عن وصفهم!
الأهلي: بن محفوظ شغله صار أوكيه من تالي! وخطة انتشارهم في كل مكان خطيرة وقوية جدًا.
ساب: ماكملت شهرين عندهم! يعني ما امداني اشوف شئ! ولكن حينما نتكلم عن ساب! ليس البنك فقط بل هي مجموعة غنية وناجحة بشتى مجالاتها.
تحياتي لك خربش
وجهز حالك يوم الجمعة صباح نروح لديراب قولف
http://www.dirabgolf.com/
3/14/2007 في الساعة 11:37 pm
الراجحي كان مستغفل الناس بحجة انه البنك الإسلامي الوحيد
والسنوات الجاية مع وجود بنك البلاد واغلب البنوك فتحت اقسام إسلامية راح نشوف بنك الراجحي ايش راح يسوي
عموماً انا معاك في قائمة الأسوأ وإن كنت احط في المرتبة الثالثة مكرر بنك الأهلي
3/15/2007 في الساعة 2:28 pm
قائمة وتصنيف رائع للبنوك..
ولكن للأسف لابد أن ترتبط بالأسوأ.. لبعض الأمور.. كالتسديد وغيره وكثرة تعامل الناس معه..
وقد قال عمنا المتنبي:
ومن نكد الدنيا على المرء أن يرى.. عدوا له مامن صداقته بد
3/15/2007 في الساعة 4:47 pm
للأسف يا باسم أنا عكسك تمام…
أنا كان راتبي ينزل في ساب ولما جيت أبغى تمويل مردحوبي (سحبو فيني) وقالوا ما فيه إلا معادن والأسهم وقفناها!! ولما قلتلهم أبغى أستحوذ على المعادن… قالوا لما تشوف حلمة ودنك (يعني ما لك أمل)… قلتلهم باي باي (مع ألف سلامة والقلب يدعي عليكم)… ولما طلبوا الشركة اللي شغال فيها إخلاء طرف من ساب برضه مردحوبي (شرح من قبل) مرة ثانية ولمدة أسبوع لما راح علي الوقت اللي لازم يتحول فيه الراتب من الشركة وأخروني شهر لما نزل الراتب في الراجحي…
أما الراجحي ورغم الماضي الأسود والسمعة السيئة اللي أنا أعرفها مسبقاً… إلا إني توجهت لهم وأنا موكل أمري لله… وبعد تحويل الراتب رحت لهم وأنا كلي شك في دعايتهم (30 دقيقة)… ورحت لهم وجلست عندهم وقت بسيط وأرسلوا طلبي للتمويل إلى الرياض عبر السيستم وجاء الرد بالرفض لأنهم يحسبون خدمتي أقل من 6 أشهر ولكن الشخص اللي في خدمة العملاء كان مطرطع (منزعج جداً) منهم وراح كتب على ردهم توضيح وأرسله مرة أخرى وردوا عليه يالموافقة… وبعدها أصبحت الأسهم في حسابي… واليوم الثاني فتحت حساب المتاجرة بالاسهم من الإنترنت وبعت الأسهم… واليوم الثاني خلصت الفلوس
… أمزح لا تصدق ههههههههه
الخلاصة… الراجحي تغير… على الأقل في الشرقية… حتى خدمة الهاتف المصرفي والانترنت… سريعين بالمرة… ومحترمين… وأما ساب فأنا أدعي عليهم من قلبي إنهم يخسرون قد اللي خسرته عشرليون مرة (أكثر من مرة)…
تحياتي؛؛؛
((((( بعد الطبع )))))
كبك (أتركك) من هذا النظام الغثيث حق السبام… جرب الــ Spam Karma 2 فهو أفضل بمليون مرة من هالعك اللي تحت… والله ثم والله لو اني ما أستخدم الفيرفوكس وإلا ما شفت هالكلام اللي فوق… الكلام هذا صدقي… لأنه بغى يروح ملح لما طلع ID Invalid… يا الله عليك يا حرببببببببببببببببازززززززز… تكفى غيره… طلبتك
!!
3/15/2007 في الساعة 6:11 pm
رديت رد طويل عريض وآخرتها يقول
!! رجاءً غير الإضافة هذي ترى الإضافات بلاش!!
No valid entry. Please try again:
مع إني متأكد بس الشكوى لله ..
(تعذر إضافة الرد 6 مرات!! )
صديقي حرباز التاجر ,, ترى فلوسك كثرت بعد التسويق في تدويناتك هذي واللي سبقها
3/15/2007 في الساعة 7:52 pm
والله كان المفروض انك تضم البنك الأهلي لقائمة البنوك السيئة والمفروض انه ياخذ
المركز الأول في ناحيه النصب.. ( بنك واحد..نصاب واحد)
مافي شي اسمه بنك اسلامي يا حرباز لكن فيه شي اسمه منتج اسلامي ..يعني في
قرض ربوي.. و مقابله (اسلامي) منتج المرابحه. وفيه اشياء كثيرة وترى عالم البنوك
عالم غامض بحكم خبرتي في مجال البنوك.
3/15/2007 في الساعة 10:14 pm
ههههههههههه
- حس بمعاناة الشباب
ياجماعة الخير خلاص توبة احط سبام فلتر ، خلاص قو اهيد كل التعليقات مفتوحه هههههههههه
باسم
لي عوده
3/15/2007 في الساعة 10:37 pm
تجربة السبام الجديد
3/16/2007 في الساعة 12:13 am
أخيراً ,,
أتفق مع محمد بن سالم في الجزء الثاني من رده فقط ..
بالنسبة لمصرف الراجحي مشكلته الضغط وكثرة العملاء ,, يعني اللي عنده حسابين أو أكثر أحدهم في مصرف الراجحي تلقى أغلب عملياته في الراجحي وبالنسبة لكثرة العمالة اللي يتعاملون معه فهم يثقون فيه بشدة!!! لأن فيه تميز وثقة وسرعة في التحويل للخارج .. حسب كلامهم طبعاً .. (عدوا له مامن صداقته بد) هو صادز
الأهلي أنا أحد عملائه وبصراحة البنك من ناحية خدمات عملاء لا يعلى عليه .. العميل العادي يحس لما يتكلم مع الموظف بأنه من عملاء الوسام(vip) والخدمات الإلكترونية نادرة التعطل ومافيه إشتراطات بالنسبة للتداول من ناحية حجم الحساب (غير 750 ريال رسوم لسنة) وأهلي أونلاين فيه خدمات مميزة وواجه سهلة وغير معقدة
البنك العربي ,, سيئ جداً و مستغل للمتقاعدين بشكل !! .. وحسب ما سمعت ان نظام معاشات التقاعد في طريقة لأن يصبح مفتوح من ناحية البنوك وسنتهي إحتكار العربي له خلال الفترة القادمة (ست شهور إذا ماني غلطان)
3/16/2007 في الساعة 2:43 am
باسم
انا اتفق معك ان ساب هو الاروع
لان داعمهم الرئيسي HSBC
ياليت هالبنك بالسعودية
اعتقد حرباز انك نسيت البنك السعودي الفرنسي
وبنك البلاد والاستثمار بعد
والا مايستاهلون الذكر لوووول
دمت لي
3/16/2007 في الساعة 8:36 pm
أنــااا معك وبكل قوة أن سااااب أفضـل بنك في السعوديـة
..
صـراحة بنـك كل شئ مميـز فيـه وأخص بالذكرة سـاب مبـاشر التصفح السريع والآمان وقلة التعليق فيـه .. وبطـاقة ســاب تدري كم تدعم شبكـة ؟ .. 6 شبكات غير عن البطايق الأخرى اللي حدها اربعه او ثلاثه وتخب .. وانا إلى يومك هذا من يوم ما طلعت البطاقة وانا شغلي على النت معاهم ما عمري طبيتـه الا وقت فتح الحساب واستلام البطاقة .. حتى رسـايلك اللي ترسلها لهم عن طريق ساب مباشر يردون عليك بأسرع وقت وعلى أي استفسـار ..
(قلب كبيـر لسـاب)
.. ولك بعد حرباز علشان ما تزعل علينا هههه 
..
تدوينـة جميلة ..
3/16/2007 في الساعة 10:06 pm
منتاز!! أدور عن موضوع كذا من زمان!
لوك منزل الموضوع أبكر شوي كان صرت عميل لـ”ساب” حالياً (أتمنى انهم ما يكتأبون وأنا نظل أصدقاء). توي فاتح حساب عند البلاد, كانت معاملة سهلة وسريعة بالمقارنة مع تجاربي مع الراجحي.
3/16/2007 في الساعة 11:59 pm
السلام عليم ورحمة الله ..
مرررره عجبني الموضوع ,, والسبب .. .. .. .. انا موظفة في أسوأ بنك بالنسبة لك
!
أخ باسم .. اتمنى أنك تكون من جد تعاملت مع مصرف الراجحي ..
وكلامك هذا ما يكون نقلاً عن فلان وعلان !!
ما راح أدافع عن الراجحي ..
بس حابه أقول أنه رضى الناس غاية لا تدرك !!
أخي الكريم .. انا لا أنكر سوء معاملة الراجحي وخدماته من افتتاحه يمكن لحد قبل 3 سنوات ..
لكن هالصوره لازمت اسم الراجحي لحد اليوم ..
للأسف الشديد مع تقدمه وتطوره في كثير من النواحي .. إلا ان الصوره باقيه ..
يعني أقرب مثال .. تجي العميلة تبي تسحب مبلغ وقدره وهي ما معاها اثباتها ..
نطلب منها تجيبه .. .. .. .. .. أووووه يالرااااجحي ايش هالتعقيد .. أف منكم يالراااااجحي خدمااااتكم زفت !!!! آآآآخ منكم يالراجحي وتقولون ليش نطلع منكم (( مع انها لااازقه عندنا ما راحت لبنك ثاني )) !!
يروح العميل لأحد الفروع ,, يلاقي موظف مطنشه وما أحسن التعامل معاه .. .. .. يا اللـــــه موظفين الراااجحي سيئين … معاملتهم خاااايسه … ما يقدرون العمييييل … تراكم تشتغلون بفلوسناااا !!!!
يعني من موظف واحد .. يحكم على المصرف وموظفيه كلهم بالسؤ !!
طبعاً هذا ما يحصل معانا بس ,, حتى مع غيرنا من البنوك !!
والله عندي الكثير أقوله بخصوص تذمر العملاء الغير مبرر .. .. بس خلها على الله !
وبالنسبه لمنتجاتنا الحمدلله كلها ( القروض , البطاقات الإئتمانيه , صناديق الاستثمار ) مطابقة للشريعه الإسلاميه ما فيها ربا وهذا سبب عملي معهم ..
واذا كان فيه شي احنا ما نعرفه فـ” حسبنا الله ونعم الوكيل ” !!
بس قلي اذا انت تتعامل مع الراجحي .. تروح أي فرع
؟؟
3/17/2007 في الساعة 1:25 am
هههههههههه
اشكر للجميع ردودهم ..
بس برد على الاخت nAs
اممم اتوقع اني ذكرت في بداية ونهاية مقالي ان هالترشيح والحكم بناءً على تجربة شخصية وليس من يقولون او من كلام الناس نهائياً ..
بالعكس لو حكمت على كلام الناس مافيه احد من ربعي ماهوب مبسوط من الراجحي ، الي اشوفه انا من أسوأ البنوك حتى بداية عام 2007 ماندري عن نهاية العام وش يصير
وبرضة تظل هذه قائمتي الشخصية مبطن فيها إسم ( قائمة حرباز ) .. ومستندة على رأي (حرباز) وعلى تجربة ( حرباز ) وبرضه حاولت اني ما انحاز لتجربتي الشخصية بل اضيف عليها اشياء تقنية وعيوب فنيه .
اختي الكريمة انا عملت في القطاع المصرفي وفي قسم خدمات العملاء ولي تجارب كبيرة في خدمة العملاء ، ولن اتحدث ابداً عن عدم وجود تدريب بالشكل المطلوب لقسم خدمة العملاء في البنك الراجحي ..
بل كان سبب ترشيحي لهم هو رداءة العملية المصرفيه بالكامل ( من مشاكل في تحويل الحسابات وإيداع المبالغ وتعطل الانظمة ) .
سألتي عن اي الفروع قد تعاملت معها . كنت اريد ان اذكر اسماء الفروع لكن لا اريد ان اظلم المتواجدين في الفروع الآن قد يكونوا تغيروا الموظفين او تغيرت اعمالهم ..
لكن لم اكن اذهب الى فرع واحد فقط ، وان كنتي (صامله) على اسماء الفروع ارسلتها لك على شكل قائمة بالإيميل
اتفق معك ان البنك تغير واتمنى ان يكون تغير للأفضل ،، وكما ذكرت في حديثي عن البنك ان البنك قام بوضع اجهزة جديدة وصرافات جديدة ومكائن جديدة ، ولاننسى انه استحدث خدمات وقام بإضافة العديد من الخدمات والفواتير والرسوم ، وذكرت عن تطبيق الشريعة الإسلامية .
خيتي بالنسبة لإفتخار البنك بانه يقدم قروض مطابقة للشريعة .. هل بإعتقادك ان ماتقوم به باقي البنوك لاتوجد به قروض شرعية ولاتوجد به هيئة شرعية ؟
وفي نفس الوقت لانسطيع ان نقول ان البنك 100% يقوم على سندات واصول وجميع استثماراته قائمة على استثمارات مطابقة للشريعة .. فحسابات الـ مرابي والذي يقرض الناس ويأخذ الربا و الصناديق الموجوده بالخارج تكون مربوطه بحساب هذا البنك ، فهل يعقل ان لاتختلط الأموال بهذه الاموال ؟ ،، نعم انا اقول ان البنك يتعامل بقروض وصناديق وبطاقات ائتمان مطابقة للشريعة الاسلامية وهذا مانعرفه لكن لانعلم بالضبط عن اختلاط المال فأصبح مثله مثل باقي البنوك ،، وهذا في نظري الشخصي وصححوني ان كنت مخطئاً .. وبرضة ما احط بذمتي شي
بالمناسبة ،، بنك الراجحي هو اول بنك قمت بفتح حساب لديهم وكان ذلك عام 1418 اي قبل 10 سنوات ومازال هذا الحساب على قيد الحياة ولله الحمد والمنه ومازال يكافح ويحاول الثبات على الرغم من الصعاب التي يواجهها في البنك ، عفواً المصرف
وتراني ما الوم البنك على ضعفه وتعليقه لأنه توجد بعض الاشياء في البنك نسيت عن ذكرها في نقاط القوة ، وهي انه يعتبر من اكثر البنوك في السعودية فروعاً واجهزة صرافه وكذلك ان اغلبية السعوديين لديهم حساب في الراجحي فماينلام على التعليق الي كم مره في السنه ، لكن ينلام على التعليق الي كل يوم او يومين
ونقدنا في النهاية ماهو الا لمصلحة جميع البنوك السعودية وعلى رأسهم مصرف الراجحي وغيره من البنوك .
اتمنى لك التوفيق في العمل في البنك ، وان نصبح من زملاء المهنه
بس اهم شي ماتكوني شغاله في الـ PR 
لي عودة اخرى بعد غد ان شاء الله ..
باسم
3/17/2007 في الساعة 10:08 am
الله يهدي مالقيت الا سامبا ( المركز الثاني ) !!
بصراحة أسوأ بنك في التعامل (بالنسبة لي) هو سامبا ..
(تحس فيهم عنجهية وتكبر .. !! على ايش ما أدري (تراك مهما كنت فانت (سامبا) )
والزحمة الي تقول في الراجحي .. روح شف سامبا .. وتعرف الزحمة كيف !!
وبعدين تعال يا أبو الشباب …
من يروح للبنك الحين ؟؟؟
من 70 إلى 80 % من التعاملات إلكترونية ..
أحسن شيء الراجحي (الفرع الي جنب بيتنا
) يوصل لك المعاملة إلى باب بيتكم :p
قال ايش .. قال (سامبا) .. !!
يالله صباح خير بس ..
دمت بخير
محمد
3/17/2007 في الساعة 1:41 pm
هيه هيه وقف السبام (
)
(
)
(
)
باخرب باخرب خخخخخخخخخ
تصنيفك تمام بس انت حاط الاهلي بالمركز الثالث والمفروض انه مايتصنف
سلملي على بنك البلاد بس
3/17/2007 في الساعة 11:20 pm
باااااسم .. معليش استحملني ,..
!!
بس مره انبسطت على الموضوع .. وابي افضفض
مافيه احد من ربعي ماهوب مبسوط من الراجحي
!!
>>> أعتقد انك صايغ الجمله غلط .. لا تقول ” ايه ” لوووو سمحت لأني مبسوطه بشكل الجملة كذا .. ..
ولن اتحدث ابداً عن عدم وجود تدريب بالشكل المطلوب لقسم خدمة العملاء في البنك الراجحي
؟؟
)) !!
>>> يعني اشتغلت في الراجحي
سواء اشتغلت أو لا ,, انا الصراحه ما أدري عن قسم الرجال !!
بس انا ” متوظفه قبل سنه وشهر ” أخذت دوره في بداية توظيفي عن خدمة العملاء ,.. وفيها تقييم ونجاح أو رسوب ..
وقاعدين يطلعون حتى الموظفات القدام دورات تدريبيه ( شكله نظام جديد ما كان موجود قبل ) يعني مررره مدّهرين على الدورات وغثونااا بالعميل , واعتقد سبب اهتمامهم ,السمعه السيئة اللي لازقه في الراجحي واللي سببها موظفيه (( الله يسامحهم
رداءة العملية المصرفيه بالكامل ( من مشاكل في تحويل الحسابات وإيداع المبالغ وتعطل الانظمة )
, بس يقولون كان يعلق كثير )) يعني فيه تقدم ..
.. .. .. لكن ينلام على التعليق الي كل يوم او يومين
>>> ما أنكر سوء انظمتهم واللي تفشششششلنا احنا الموظفين قدام العميل .. بس صدقني ما عاد يعلق زي أول (( انا ما صادفت تعليق إلا مرتين في 5 شهور
تراني ما أدافع عنهم !! انا اتمنى أطلع منهم اليوم قبل بكره .. لو بجلس عندهم ما راح أتطور أبداً ولا راح أنتج وأطلع اللي عندي !!
بس اللي يقهرني لما تتعامل وتخدم العميل بكل اخلاص , ويكون راضي ومبسوط طول الوقت وبتقصير بسيط ,, أحياناً مو من الموظف من النظام نفسه .. كشّر العميل عن أنيابه وصرت أنت الموظف السيء و ” هذا انتم يالراجحي ” !!!!
ليش بس
حرام والله مو كل الفروع ولا كل الموظفين زي بعض !!
وبالنسبه للربا .. انا قلت لك انه هذا اللي نعرفه وفاهمينه .. اذا فيه شي ما نعرفه .. في ذمتهم مالي شغل !
!
والبنوك الثانيه فيها معاملات شرعيه ,, بس مو كلها وهذا الفرق ! ويمكن ظهور بنوك اسلامية غير الراجحي هو اللي خلاه يتغير ويطور من نفسه !
يعني من نعم الله علينا ” بنك البلاد و موبايلي ” .. .. ..
شكراً .. طلعت حرتي في موضوعك ,..
وتراني مانيب صامله على أسماء الفروع ,.. بكيفهم خلهم يسوون اللي يبون
!!
>>> خربتها بالأخير .. ..
3/19/2007 في الساعة 8:43 am
أجل وين بنوك “السعودي للاستثمار، البلاد، الإمارات” يا صديقي يا حربااااااااز
3/19/2007 في الساعة 3:45 pm
8
8
انظر اعلاه بتمعن
الإمارات موب بنك سعودي ،، ولا بنك عمان ولا البحرين
3/27/2007 في الساعة 9:22 am
حرباز،
مصرف الراجحي أو ما أسميه بقالة الراجحي ذبحوني حتى أفتح عندهم حساب و لكن مرغم أخاك لا بطل.
رحت للفرع ثلاث مرات حتى أخيراً فتحت الحساب. حسيت إني قاعد أشحت. إسلوب تعامل موظفي خدمات العملاء معي كان زفت و عطلوني كثير و واحد منهم مره قالي ما نفتح للك حساب إلا تجينا بموعد!!!!!!!!!!!.
للأسف وضح لي إن البنك بخيل في عدد الموظفين في الفروع و الضغط كبير عليهم و بالتالي ما يكون عندهم خلق يتعاملوا كويس مع الناس.
لكن إن شاء الله سنتين و أنتهي من دفع التمويل و أقفل الحساب معهم للأبد.
3/31/2007 في الساعة 8:24 am
قائمتي الأسوأ:
1- بنكي بنك الهياط — قصدي الرياض. شعار الـ 2005 وخدمات الـ 1967 ولا يهون بنك التقاعد (العربي) والبيروقراط (الاستثوار).
2- ساب - مقرفين أجل جاي أصرف شيك وعقدوني تعقيد، يقولون هذا باسم مؤسسة وانا جايب لهم السجل والختم، قالوا لازم يوقع قلت اقروا أنا المدير، قالوا: لازم توقيع المؤسسة!!! قلت: من تبي يوقع لك؟ الكرسي والا الطاولة؟ ثم كلمت مديرهم وعلعل بي وانطقيت ساعة لين اتصل باللي كتب لي الشيك… وش فايدة التوقيع أجل؟ والشيك؟ والسجل؟ والختم؟ الله يحوم تسبودهم.
3- سامبا: كل شوي موقفين حسابي => ليه؟ والله بريدك تغير!! قلت: ما تغير.. ألغيته.. أنا مقاطع للبريد.. قالوا أجل نجمد حسابك!!!!!!!! والله يا جماعة.. قلت (ببرائة) ليه؟ قالوا: وشلون نرسللك كشفك؟ قلت: والإيميل؟ وش طعنته؟ والمباشر؟ قالوا: والبطايق (جمع بطاقة)؟ قلت أجيكم. أصلاُ أنتم جنبي في الملك عبدالله وبريدي في الشفا!!! قالوا: Don’t Much لا يكثر فقمت عطيتهم بريد واحد من الشباب. ولا جتني بطاقتهم.. فرحت للفرع ودفعت 50 ريال عشان يطلعون لي بطاقة. والحين أبي أحول راتبي من عندهم ويسحبون فيني إلى الحين (مع العلم اني ما قد اقترضت).
4- الراجحي زحمة، والا خدمات أونلاين روعة وسامبا إسلامية صح بس أجراءاتهم معقدة إذا راتبك مهوب عندهم.
فيه بنوك ما جربتها:
الأهلي: يمدحونه وانشالله بروح له.
البلاد، الإمارات، الفرنسي والهولندي (كئيب وحق أسهم بالغالب)
وعلى فكرة.. فيه سالفة صارت لي استغربت منها مرة…
أسولف أنا وصديق لي قطري فقلت له أنا مقاطع البريد، قال وفواتيرك وكشوف حسابك؟
قلت: أونلاين!!! قال: ماشالله أي بنك؟ Oo قلت: نعم؟!!! كل البنوك.. استغرب الرجال مرة (وشكله ما صدقني) قال وفواتير التلفون والكهرب!!!!
فاحمدوا ياشباب ربكم على النعمة.. هذي قطر اللي يقولون أغنى دوله في العالم..
7/15/2008 في الساعة 8:49 pm
افضل بنك البنك السعودي للاستثمار مريح جدا
وقروضهم توسع الصدر حتى اذا جيت تسدد